Heil í gegn­um umbreyt­ing­ar

Breytingar eru óhjákvæmilegar í lífi og starfi, en þær eru sjaldnast þægilegar. Þær geta skapað óöryggi, hrist upp í rútínu og tekið frá okkur bæði orku og stöðugleika. Á þessu námskeiði færðu hagnýtar aðferðir til að takast á við breytingar með meiri styrk, sveigjanleika og tilgangi, hvort sem um er að ræða væntanlegar breytingar eða óvæntar aðstæður sem þú þarft að takast á við.

Námskeiðið byggir á aðferðum úr íþróttasálfræði og persónulegri reynslu kennara sem hefur þurft að takast á við margar stórar breytingar. Aðferðirnar eru yfirfærðar á daglegt líf á lifandi og skemmtilegan hátt. Í námskeiðinu er farið í hvernig við getum brugðist við á þremur lykil tímasetningum: Áður en breytingar verða, á meðan á þeim stendur og eftir að þær hafa gengið yfir. Þú færð hagnýt verkfæri sem þú getur nýtt þér og vinnubók sem leiðir þig í gegnum að tengja þau við þitt eigið líf. Markmiðið er að hjálpa þér að upplifa meiri stjórn, líða betur og dafna í gegnum breytingar.

Námskeiðið hentar öllum sem vilja verða betri í að takast á við breytingar í vinnu eða einkalífi, óháð starfsgrein eða bakgrunni. Það er sérstaklega gagnlegt fyrir fólk sem vill vaxa og dafna í gegnum breytingar, stórar sem smáar.