184 útskrifuð af sjö námsbrautum

Síðastliðinn föstudag voru 184 brautskráð frá Endurmenntun Háskóla Íslands. Athöfnin fór fram í Háskólabíói og að þessu sinni var um að ræða námsbrautirnar jákvæða sálfræði, verkefnastjórnun og leiðtogaþjálfun, leiðsögunám, sálgæslu, ökukennaranám, sérnám í hugrænni atferlismeðferð og löggildingu fasteigna- og skipasala.

Félagar í Lúðrasveitinni Svani spiluðu létt íslensk dægurlög í anddyrinu og tóku þannig vel á móti fjölda góðra gesta sem var viðstaddur athöfnina.

Hildur Elín Vignir endurmenntunarstjóri bauð öll velkomin í opnunarræðu sinni og þá ávarpaði Steinunn Gestsdóttir, aðstoðarrektor Háskóla Íslands, einnig samkomuna.

Logi Einarsson, menningar-, nýsköpunar- og háskólaráðherra, flutti hátíðarræðu. Þar sagði hann meðal annars: „Við lifum jú á tímum þar sem tæknin þróast með gríðarlegum hraða, og vinnumarkaðurinn fylgir í kjölfarið. Ný störf verða til, önnur hverfa, og það sem við lærðum fyrir tíu árum getur verið úrelt á morgun. Sama hver ástæðan er fyrir því að þið sitjið hérna í dag þá hafið þið öll sýnt af ykkur framtakssemi, hugrekki og þrautseigju - eiginleika sem eru lykillinn að því að takast á við framtíð sem enginn getur spáð nákvæmlega fyrir.“

Tónlistarkonan Marína Ósk flutti falleg lög á milli atriða og kom öllum í hátíðlega stemningu.

Við hjá Endurmenntun Háskóla Íslands óskum öllum útskriftanemum okkar innilega til hamingju og vonum að þekkingin, færnin og verkfærin sem þið hafið öðlast opni ykkur nýja möguleika - og að tengslin ykkar á milli haldist áfram, því þau eru ómetanleg.

Hér eru nokkrar myndir frá athöfninni.