ATH! 6. mars - Tlfinningavandi og DAM-nálgun. Námskeið haldið á Akureyri.  

24. mars - Tilfinningavandi og DAM-nálgun. Námskeið í Dunhaga 7, Reykjavík. 

Á námskeiðinu er fjallað um hvernig aðferðir díalektískrar atferlismeðferðar (DAM) nýtast í að efla tilfinningastjórn og bæta lífsgæði einstaklinga með alvarlegan tilfinningavanda. Tilfinningavandi getur m.a. birst í miklum tilfinningasveiflum, samskiptavanda, sjálfsskaða og sjálfsvígshegðun, truflun á sjálfsmynd og svart-hvítri hugsun. Leiðbeinendur á námskeiðinu eru meðferðaraðilar í DAM-teymi Landspítala.

Tilfinningavandi einkennist af alvarlegum tilfinningalegum óstöðugleika sem getur haft áhrif á öll svið lífsins og valdið mikilli þjáningu hjá einstaklingum sem hann hafa og fjölskyldum þeirra. Einstaklingar með tilfinningavanda búa við mikla þjáningu og mæta oft litlum skilningi í umhverfinu. Díalektísk atferlismeðferð (DAM) er gagnreynd meðferð við tilfinningavanda en á Landspítala er hún veitt af sérhæfðu meðferðarteymi á göngudeild lyndisraskana.

DAM-meðferð byggist á færniþjálfun, viðurkennandi samskiptum og núvitund. Á námskeiðinu verður fjallað um tilfinningavanda; einkennamynd, orsakir, þróun og rannsóknir. Helstu atriði og uppbygging DAM-meðferðar verður kynnt. Farið verður í grunnatriði viðurkennandi samskipta sem eru árangursrík í meðferð einstaklinga með tilfinningalegan óstöðugleika. Nokkur meðferðartæki sem geta nýst á breiðum grundvelli verða kynnt s.s. keðjugreining, streituþolsplön og færni í tilfinningastjórn.

Námskeiðið byggist á fyrirlestrum, umræðum og verklegum æfingum.

Þátttaka í námskeiðinu jafngildir ekki þjálfun sem þarf til að verða DAM-meðferðaraðili.

Á námskeiðinu er fjallað um

• Tilfinningavanda – einkennamynd, orsakir, þróun, rannsóknir.
• DAM-meðferð – helstu atriði og nálgun.
• Viðurkennandi samskipti.
• Núvitund - grunnatriði.
• Keðjugreiningu.
• Streituþolsplön.
• Færni í tilfinningastjórn.

Ávinningur þinn

• Aukin færni í nálgun og meðferðarvinnu með einstaklingum sem hafa tilfinningalegan óstöðugleika.
• Þekking á grunnatriðum núvitundar og gagnsemi í meðferð.
• Grunnþekking á DAM-nálgun.
• Grunnþekking í notkun á keðjugreiningum og streituþolsplönum.

Fyrir hverja

Fagaðila í heilbrigðisþjónustu, félagsþjónustu eða skólum.

Nánar um kennara

Gunnhildur Gunnarsdóttir er sérfræðingur í klínískri sálfræði. Hún er teymisstjóri DAM-teymis á göngudeild lyndisraskana Landspítala og DAM-meðferðaraðili. 
Ragnheiður H. Eiríksd. Bjarman er geðhjúkrunarfræðingur. Hún er aðstoðardeildartstjóri á göngudeild lyndisraskana Landspítala og DAM-meðferðaraðili.