Upplýsingar vegna Covid-19 aðgengilegar hér

null
Fréttir

Nýr samningur milli Endurmenntunar og Staðlaráðs

Endurmenntun HÍ og Staðlaráð Íslands gerðu með sér samning á dögunum sem felur í sér að Endurmenntun yfirtekur nú námskeiðahald sem Staðlaráð hefur boðið upp á um langt árabil. Fjöldi gildra íslenskra staðla er nú um 30.000 en tilgangur þeirra er að tryggja öryggi og neytendavernd, auka umhverfisvernd og samhæfa kröfur og virkni og gæði á einsleitum innri markaði í Evrópu. Þá hefur vefverslun Staðlaráðs að geyma á þriðja tug þúsunda alþjóðlegra staðla til viðbótar sem gagnast skipulagsheildum um allt samfélagið við að bæta rekstur, skilvirkni og afköst og einfalda og samræma alls kyns hluti, okkur öllum til góðs.

Námskeið sem tengjast stöðlum varða oftast notkun og beitingu einstakra staðla eða staðlaraða þar sem færustu sérfræðingar veita mikilvæga leiðsögn um notkun þeirra. Endurmenntun hefur að markmiði að vera ávallt eftirsóknarverðasti valkostur fyrirtækja, stofnana og einstaklinga til símenntunar á Íslandi og er það því mikill fengur fyrir stofnunina að geta sett þessi sérhæfðu námskeið á dagskrá.

Staðlaráð mun vinna náið með Endurmenntun til að tryggja upplýsingaflæði og góðan undirbúning fyrir námskeiðahaldið og þróun fleiri námskeiða eftir því sem þarfir vinnumarkaðarins kalla. Stefnt er á að fyrstu námskeiðin verði haldin í janúar 2022.

Á myndinni eru Sæunn Stefánsdóttir, starfandi endurmenntunarstjóri, Helga Sigrún Harðardóttir, framkvæmdarstjóri Staðlaráðs og Jóhanna Rútsdóttir, náms- og þróunarstjóri Endurmenntunar.

Verð