Á námskeiðinu verður sagan rakin og staldrað við hnýsilega staði sem varpa ljósi á framvindu sögunnar, persónusköpun og skírskotun til samfélagsgerðar, hugmynda og atburða úr samtímanum. Hugað verður sérstaklega að frásagnarlist höfundar, en honum er einkar lagið að skapa aðstæður þar sem þversagnir og spenna í sálarlífi persónanna koma fram. Þetta á ekki síst við um aðalpersónurnar í ástarþríhyrningnum banvæna, Guðrúnu, Kjartan og Bolla. Margt bendir til þess að sagan hafi verið samin af konu, eða a.m.k. fyrir konur. Farið verður í saumana á rökum sem fræðimenn hafa sett fram um höfundskap Laxdælu. Einnig verða kenningar kennarans um söguna kynntar.

Á námskeiðinu er fjallað um

Laxdæla sögu.
Frásagnarlist.
Eftrirminnilegar kvenpersónur.
Íslenskt miðaldasamfélag.
Átök Sturlungaaldar.

Ávinningur þinn

Betri þekking á einu mesta listaverki bókmenntasögunnar.
Aukinn skilningur á stöðu kvenna í íslensku miðaldasamfélagi.
Skemmtun.
Þekking á átökum Sturlungaaldar og tengsl við sagnaritun.

Fyrir hverja

Námskeiðið er ætlað öllu áhugafólki um sögu og bókmenntir miðalda, ekki síst þeim sem hafa áður sótt námskeið Endurmenntunar. Það er tilvalið fyrir kennara í efstu bekkjum grunnskóla og framhaldsskóla, leiðsögumenn og aðra sem tengjast menningartengdri ferðaþjónustu.

Nánar um kennara

Torfi Tulinius er prófessor í íslenskum miðaldafræðum við Háskóla Íslands. Hann hefur skrifað bækur og greinar um íslenskar fornbókmenntir og kennt fjölmörg námskeið um þær á vegum Endurmenntunar.
Gestakennari á námskeiðinu verður Vilborg Davíðsdóttir, en hún hefur skrifað fjölmargar skáldsögur sem byggja á fornsögum, þ.á.m. þríleikinn um Auði djúpúðgu, Auði, Vígroða og Blóðug jörð.