Í samstarfi við forsætisráðuneytið

Á námskeiðinu er fjallað um:
• Kröfur jafnlaunastaðalsins og tilgang stjórnunarstaðla.
• Jafnréttislöggjöf og dómaframkvæmd.
• Kjarasamningsumhverfi hins opinbera.
• Kjarasamningsumhverfi almenns vinnumarkaðar.
• Vinnurétt og íslenska jafnréttislöggjöf.
• Starfaflokkun.
• Launagreiningu.

Námsefni:
• ÍST 85 Jafnlaunakerfi – Kröfur og leiðbeiningar (ekki innifalið í námskeiðsgjaldi – þátttakendur skulu útvega sér staðalinn sjálfir)
• Mismunandi kjarasamningar opinbers og almenns vinnumarkaðar.
• Viðeigandi dómar, úrskurðir og álit.
• Jafnréttislöggjöf.
• Kennslugögn sem hægt verður að nálgast á námsumsjónarkerfinu Canvas sem þátttakendur fá aðgang að.

Fyrir hverja:
Námskeiðið er ætlað þeim sem munu framkvæma úttektir á jafnlaunakerfum á vegum vottunaraðila. Æskilegt er að þátttakendur hafi grunnþekkingu á ÍST 85 Jafnlaunakerfi – Kröfur og leiðbeiningar og í tölfræði. Þá er námskeiðið jafnframt ætlað þeim úttektaraðilum sem vilja viðhalda þekkingu sinni samkvæmt viðmiðum (Sértæk viðmið fyrir vottunaraðila jafnlaunastaðalsins ÍST 85) sem velferðarráðuneytið gaf út árið 2017.

Jafnframt gagnast námskeiðið mannauðsstjórum, ráðgjöfum og öðrum sem koma að innleiðingu jafnlaunastaðalsins í fyrirtækjum og stofnunum.


Próf:
Námskeiðinu lýkur með tveggja klukkustunda prófi föstudaginn 17. maí kl. 9:00 - 11:00. Próftökurétt hafa þátttakendur sem hafa setið alla kennsludaga námskeiðsins. Gerð er krafa um 80% mætingu í kennslustundir. Skilyrði er að úttektarmenn standist prófið með fyrstu einkunn sem er 7,25 og fá þeir skírteini því til staðfestingar. Ekki er gerð krafa um lágmarkseinkunn fyrir hvern prófhluta. Valkvætt er að ljúka námskeiðinu með prófi, þeir sem þreyta ekki próf fá ekki skírteini en geta fengið staðfestingu um að hafa setið námskeiðið. Skráning í próf fer fram í lok síðustu kennslustundar. Þátttakendur útvega leyfileg prófgögn sjálfir.

Nái próftaki ekki lágmarkseinkunn fær hann tækifæri til að þreyta upptökupróf. Óski þátttakandi eftir að endurtaka próf þarf hann að taka alla hluta þess aftur. Ef þátttakandi er veikur á prófdegi þarf að skila inn læknisvottorði.
Prófsýning verður haldin ef óskað er eftir því.

Kennsla:
Arngrímur Blöndahl, verkefnastjóri hjá Staðlaráði Íslands.
Guðný Einarsdóttir, sérfræðingur í fjármála- og efnahagsráðuneytinu.
Jón Fannar Kolbeinsson, lögfræðingur hjá Jafnréttisstofu.
Karen Ósk Nielsen Björnsdóttir, lögfræðingur hjá ASÍ.
Maj-Britt Hjördís Briem, lögfræðingur hjá Samtökum atvinnulífsins.
Þóra Kristín Þórsdóttir, sérfræðingur hjá BHM.


Aðrar upplýsingar:
Þátttakendur fá aðgang að námsumsjónarkerfinu Canvas þar sem hægt verður að nálgast námsefni, kennsluskrá, tilkynningar, einkunn úr prófi og fleira.