Truflun á vitrænum þáttum, s.s. athygli, einbeitingu, vinnsluhraða, minni, stýrifærni og félagslegum skilningi er partur af einkennamynd margra geðraskana og getur haft umtalsverð áhrif á færni í daglegu lífi, s.s. samskipti, sjálfstraust og lífsgæði. Mikill breytileiki er milli einstaklinga og getur einstaklingur verið með félagsskilningsvanda án þess að eiga í vanda með athygli og minni eða öfugt. Því er gagnlegt að þekkja ólíkar birtingarmyndir vitræns vanda og viðeigandi leiðir til að bregðast við.

Vitræn endurhæfing og félagsskilningsþjálfun eru aðferðir sem byggja á atferlismótun, kennslufræði og hugrænni atferlismeðferð og er markmiðið að bæta vitræna þætti varanlega og stuðla að því að árangurinn nýtist í daglegu lífi.

Á námskeiðinu er fjallað um

Umfang og eðli skertrar vitrænnar getu hjá fólki með ólíkar geðraskanir og áhrif á daglegt líf.
Aðferðir vitrænnar endurhæfingar og félagsskilningsþjálfunar.
Vinnu með skjólstæðingum sem eru með umtalsverða vitræna skerðingu.

Ávinningur þinn

Betri skilningur á vitrænni getu og hvernig vitræn skerðing hefur áhrif á daglegt líf hjá fólki með geðraskanir.
Hagnýt ráð til að koma upplýsingum til skila á einstaklingsmiðaðan hátt til fólks með geðraskanir.
Þekking á aðferðum vitrænnar endurhæfingar og félagsskilningsþjálfunar.

Fyrir hverja

Námskeiðið er fyrir fólk með fagmenntun sem starfar með unglingum eða fullorðnu fólki sem glímir við geðraskanir.

Nánar um kennara

Ólína G. Viðarsdóttir er með BA og kandidatspróf í sálfræði, auk þess að hafa lokið doktorsprófi í líf- og læknavísindum. Í doktorsnámi sínu rannsakaði Ólína hugræna getu og áhrif hugrænnar endurhæfingar á hugræna getu, líðan og færni í daglegu lífi. Ólína starfar sem sálfræðingur á geðþjónustu Landspítala. Auk þess sinnir Ólína gestakennslu við Háskóla Íslands.