Rekstraráætlun er lykilplagg í stjórnun fyrirtækja – hún endurspeglar markmið eigenda og stjórnenda og þjónar sem áttaviti í daglegri starfsemi. Á þessu námskeiði er farið yfir uppbyggingu og helstu þætti rekstraráætlunarinnar, ásamt því að sýnt er hvernig gervigreind getur stutt við gerð hennar og eflt ákvarðanatöku.

Þátttakendur fá innsýn í hvernig hefðbundnar aðferðir við áætlanagerð má bæta með gervigreindarlausnum sem auðvelda skipulagningu, nákvæmari spár og stöðugt endurmat á forsendum. Einnig verður fjallað um notkun rúllandi áætlana og hvernig þær nýtast í innkaupa- og birgðastýringu.

Á námskeiðinu er fjallað um

• Uppbyggingu rekstraráætlana og helstu grunnþætti þeirra.
• Þátttakendur læra að bera saman áætlanir og rauntölur og nýta niðurstöður í ákvarðanatöku.
• Hvernig ný tækni, sérstaklega gervigreind, getur einfaldað vinnuferla, stutt við tekju- og kostnaðaráætlanir og veitt innsýn í nýjar leiðir til að skipuleggja verkefni.
• Sérstök áhersla verður á notkun gervigreindarlausna í áætlanagerð, söluspám og yfirferð á forsendum.

Ávinningur þinn

• Skýr sýn á tilgang, uppbyggingu og lykilþætti rekstraráætlunar.
• Reynsla af gerð rekstraráætlunar með því að vinna hnitmiðuð verkefni í tímum.
• Kunnátta í að nýta gervigreindarlausnir við áætlanagerð, söluspár og við mat á rekstrarlegum forsendum.
• Færni til að innleiða rúllandi áætlanir og tengja þær við innkaupa- og birgðastýringu.

Fyrir hverja

Námskeiðið hentar stjórnendum, fjármálastjórum, frumkvöðlum og öllum þeim sem vilja efla færni sína í áætlanagerð og kynnast nýtingu gervigreindar til að styðja við betri ákvarðanatöku.

Nánar um kennara

Þorsteinn Siglaugsson ráðgjafi er með BA-próf í heimspeki og MBA-próf frá INSEAD. Hann hefur um árabil starfað við ráðgjöf á sviði áætlanagerðar og greiningar fyrir fjölda fyrirtækja og stofnana bæði hér á landi og erlendis. Þorsteinn er frumkvöðull í nýtingu gervigreindar við skipulega greiningu og ákvarðanatöku og starfar við ráðgjöf og þjálfun víða um heim á vegum Marris Consulting í París. Hann vinnur jafnframt að þróun hugbúnaðarlausna sem styðja við notkun gervigreindar við greiningu og ákvarðanatöku.