Á námskeiðinu verður fjallað um líðan barna sem búa á tveimur heimilum og álagið sem því fyrirkomulagi getur fylgt. Farið verður yfir hvaða áhrif samvistarslit foreldra geta haft á þroska, aðlögun og afdrif barna. Lögð er áhersla á að þátttakendur kynnist gagnlegum nálgunum og hagnýtum aðferðum sem stuðla að stöðugleika, fyrirsjáanleika og vellíðan barnsins innan skólakerfisins. Á námskeiðinu verður stuðst við fræðilega og faglega nálgun á viðfangsefnið.

Á námskeiðinu er fjallað um

Fræðilega vitneskju um aðstæður barna sem búa á tveimur heimilum.
Áhrif skilnaðar á líðan og afdrif barna.
Viðbrögð barna við skilnaði.
Þarfir barna sem búa á tveimur heimilum.
Mikilvægi foreldrasamstarfs og áhrif ágreinings á börn.
Nálganir innan skólans sem stuðla að vellíðan, fyrirsjáanleika og öryggistilfinningu barna sem búa á tveimur heimilum.
Hvernig starfsfólk skólans er verndandi þáttur í lífi barna.

Ávinningur þinn

Færni í að þekkja álagsmerki í hegðun og líðan barna.
Færni í að bregðast við tilfinningum barns og nálgast það í samtali um eigin aðstæður.
Hugmyndir að aðferðum til að innleiða verklag og ferla innan skólans sem varða mál barna og fjölskyldna á tveimur heimilum.
Þekking til að miðla upplýsingum til foreldra sem varða skipulag í kringum barnið og viðeigandi inngrip og úrræði.

Fyrir hverja

Starfsfólk leik- og grunnskóla sem starfar með börnum og unglingum.

Nánar um kennara

Ragnheiður Lára Guðrúnardóttir er félagsráðgjafi M.A, stofnandi og eigandi meðferðar- og ráðgjafarstofunnar Tvö heimili og teymisstjóri á Geðheilsumiðstöð barna.
Davíð Alexander Östergaard hefur lokið BA-gráðu í uppeldis- og menntunarfræði, er í námi á meistarastigi í foreldrafræðslu og uppeldisráðgjöf og er jafnframt aðstoðarkennari hjá HÍ.
Bæði eru þau skilnaðarráðgjafar hjá SES-Pro og foreldrar barna á tveimur heimilum.