Í samstarfi við Samtökin ´78

Námskeiðið verður blanda af fræðslu, verkefnum og umræðum. Farið verður yfir öll helstu hugtök er tengjast hinsegin heiminum svo sem kynhneigð, kynvitund, kyneinkenni og kyntjáningu. Farið verður yfir birtingarmyndir hinseginleikans hjá börnum á leikskólaaldri og yngsta stigi grunnskóla, bæði hjá börnunum sjálfum og fjölskyldum þeirra. Kennarar og aðrir sem vinna með börnum á þessum aldri eru í lykilstöðu til að styðja við börn sem hafa ódæmigerða kyntjáningu eða koma úr fjölbreyttum fjölskyldum. Einnig geta þeir stutt önnur börn í að alast upp við fjölbreytileikann sem eðlilegan hluta samfélagsins. Skoðuð verður formgerð skólans ásamt námskrá og kennsluefni sem hægt er að nota til að styðja öll börn í að geta verið þau sjálf. Námskeiðið er haldið í samstarfi við Samtökin ’78.

Á námskeiðinu er fjallað um

Hinsegin börn.
Hinsegin fjölskyldur.
Mannréttindi.
Fjölbreytileika.

Ávinningur þinn

Aukin þekking á hinseginleikanum.
Aukin geta til að styðja við hinsegin börn og fjölskyldur.
Þekking á fjölbreyttu efni.

Fyrir hverja

Námskeiðið er fyrst og fremst fyrir leik- og grunnskólakennara á yngsta stigi ásamt öðru starfsfólki skólakerfisins sem vinnur með börnum á aldrinum 1 - 10 ára.

Boðið verður upp á að senda spurningar til kennara fyrir kennslutímann sem verður svo svarað í tímanum.

Nánar um kennara

Sólveig Rós er með M.A. í stjórnmálafræði og diplóma í hagnýtri jafnréttisfræði. Hún er fyrrverandi fræðslustýra Samtakanna ’78.