Gerðu næstu ferð að Þingvöllum að einstæðri upplifun! Á þessu námskeiði deila sérfræðingar úr fimm fræðasviðum dýrmætri innsýn í náttúru, sögu og arfleifð Þingvalla – helgasta svæði Íslendinga.

Þetta þriggja kvölda námskeið veitir þverfaglega sýn á Þingvelli í gegnum jarðfræði, líffræði, fornleifafræði, stjórnmálasögu og verndunarsjónarmið. Kennslan fer fram með fyrirlestrum frá sérfræðingum sem hafa rannsakað og unnið að verndun svæðisins.

Á námskeiðinu er fjallað um

• Helstu jarðmyndanir á Þingvallasvæðinu, jarðskorpufleka og gosbeltaflutninga
• Lífríki Þingvallavatns, vistkerfi þess og álag á vatnið
• Löggjöf og regluverk sem verndar Þingvallavatn og vatnasvið þess
• Sögu alþingis, Lögbergs og hlutverk lögsögumanns
• Túlkun þjóðveldisins, lýðveldis og ríkisvalds í sögulegu samhengi
• Þingvelli sem tákn andófs og minninga, t.d. refsinga og þjóðhátíða
• Hugmyndir Jóns Sigurðssonar og Tómasar Sæmundssonar um Þingvelli í samtímanum
• Fornleifarannsóknir frá 19. öld og núverandi skráning í þjóðgarðinum
• Þjóðgarðsstjórn og helstu verkefni á svæðinu
• Þingvelli á Heimsminjaskrá UNESCO- þýðingu og áhrif

Ávinningur þinn

• Þekking á jarðfræði og vistkerfi Þingvalla
• Innsýn í stjórnskipulegt og menningarlegt gildi svæðisins
• Betri skilningur á verndunarmálum og fornleifarannsóknum
• Dýpri tenging við sögu og sjálfsmynd þjóðarinnar

Fyrir hverja

Námskeiðið hentar öllum sem vija dýpka skilning sinn á Þingvöllum. Sérstaklega gagnlegt fyrir kennara, leiðsögumenn, starfsfólk menningarstofnana, náttúruverndar og þau sem starfa í ferðaþjónustu. Engar forkröfur.

Nánar um kennara

Einar Ásgeir Sæmundsen, þjóðgarðsvörður

Guðni Th. Jóhannesson, prófessor í sagnfræði við Háskóla Íslands og fyrrverandi forseti Íslands

Hilmar Malmquist, vatnalíffræðingur og forstöðumaður Náttúruminjasafns Íslands

Margrét Hrönn Hallmundsdóttir, fornleifafræðingur og deildarstjóri fornleifadeildar Náttúrustofu Vestfjarða

Páll Einarsson, jarðfræðingur og prófessor emeritus

Viðar Pálsson, dósent í sagnfræði við Háskóla Íslands