Námskeiðið er haldið í samstarfi við Iðjuþjálfafélag Íslands

Megin áhersla námskeiðsins verður út frá umfjöllun um nýja sýn Tom Kitwood á heilabilun. Helstu brautryðjendur persónumiðaðrar öldrunarþjónustu verða kynntir sem og hugmyndafræðin (hornsteinar og einkenni nýrrar menningar). Þátttakendur fá innsýn í persónumiðaðar verkfærakistur t.a.m. VIPS/VPM, Eden Alternative, Spark of Life og hvernig þær nýtast í starfi og í markvissri innleiðingu hugmyndafræði í öldrunarþjónustu. Fjallað verður um nýja menningu og tengingu við hugmyndafræði iðjuþjálfunar. Stuðst er við Kanadíska líkanið.

Á námskeiðinu er fjallað um

• Menningu og samfélag í öldrunarþjónustu.
• Þætti sem eldra fólk sjálft telur mikilvæga fyrir gott líf á hjúkrunarheimili.
• Tækifæri og áskoranir við innleiðingu persónumiðaðrar þjónustu.

Ávinningur þinn

• Meiri þekking um menningu og samfélag sem áhrifaþætti í starfsumhverfi okkar og lífi eldra fólks sem þarfnast aðstoðar.
• Innsýn í verkfærakistur persónumiðaðrar hugmyndafræði.
• Nýjar hugmyndir og leiðir í starfi.
• Vettvangur til að viðra eigin reynslu.

Fyrir hverja

Iðjuþjálfa sem langar til að rýna í eigin starfsvettvang og starf út frá sjónarhóli óefnislega þáttar umhverfisins og fræðast um heildrænar aðferðir til að veita persónumiðaða öldrunarþjónustu.

Aðrar upplýsingar

Stuðst er við bókina Ný menning í öldrunarþjónustu eftir Sigrúnu Huld Þorgrímsdóttur (2019) og Ný sýn á heilabilun, einstaklingurinn í öndvegi eftir Tom Kitwood, í þýðingu Svövu Aradóttur (2007) og skrif fræðafólks sem byggir sitt starf á persónumiðaðri hugmyndafræði. 
Hægt er að fá Nýja menningu e. SHÞ keypta í tengslum við námskeiðið (ekki innifalin í námskeiðsgjaldi). Fyrirspurnir um bókina má senda til Berglindar á netfangið ergobegga@gmail.com.

Nánar um kennara

Berglind Indriðadóttir lærði iðjuþjálfun í Danmörku og lauk námi 2002. Hún hefur starfað á þremur starfsstöðvum Landspítala og sinnt þar fólki á öllum aldri, en mest öldruðum. Hún hefur einnig starfað á þremur hjúkrunarheimilum, hjá heimahjúkrun, í félagsþjónustu sveitarfélags og fyrir færni- og heilsumatsnefnd Norðurlands. 

Hún hefur frá árinu 2013 haft umsjón með starfsemi Farsællar öldrunar - Þekkingarmiðstöðvar, sinnt kennslu og námskeiðahaldi innan mennta- og öldrunarstofnana og fyrir félagasamtök. Berglind er með diplóma frá HÍ, í opinberri stjórnsýslu, öldrunarþjónustu og félagsfræði með áherslu á stjórnun atvinnulífs og velferðar.