Námskeiðið samanstendur af fyrirlestri, sýnidæmum, verkefnavinnu og umræðum. Kynntar verða aðferðir meðal annars til að skipuleggja umhverfið, mæta hreyfi- og snertiþörf barna með ADHD og skyldar raskanir, kenna félagsfærni og fyrirbyggja og takast á við erfiða hegðun og mótþróa á einfaldan hátt. Aðferðirnar verða settar í samhengi meðal annars með umfjöllun um samsetningu barnahópsins og um eðli hegðunar. Þátttakendum gefst færi á að æfa sig milli kennsludaga og í verkefnavinnu og fá endurgjöf og ráðleggingar eftir þörfum. Markmiðið er að hver og einn tileinki sér að minnsta kosti 2 til 5 aðferðir til að bæta hegðun og auka vellíðan barna og starfsfólks í leikskólanum.

Á námskeiðinu er fjallað um

Hvers vegna það er þörf á fræðslu um hagnýtar aðferðir í leikskólastarfi.
Eðli hegðunar og áætlun til að takast á við erfiða hegðun barna.
Hvernig skipulag umhverfis og notkun sjónræns áreitis getur aukið líkur á æskilegri hegðun, bætt líðan og veitt börnum tækifæri á að þroskast eðlilega.
Hvað gagnast best til að fá börn til samvinnu.
Hagnýtar aðferðir til að fyrirbyggja og takast á við erfiða hegðun einstaklinga, hópa og barnahópsins í heild.

Ávinningur þinn

Aukinn skilningur og ný sýn á samsetningu barnahópsins og hvers vegna erfið hegðun breytist ekki heldur versnar og stigmagnast ef ekkert er gert.
Aukinn skilningur á hverju er hægt að breyta í eigin hegðun og umhverfinu til gera börnin betur í stakk búin til að taka þátt í öllu leikskólastarfinu og þroskast eðlilega.
Lærir hvernig er hægt að gera áætlun um íhlutun fyrir erfiða hegðun hjá einstaka börnum og leiðir til að fyrirbyggja og takast á við mótþróa.
Lærir hvernig er hægt að koma til móts við hreyfi- og snertiþörf nemenda með ADHD, einhverfu og skildar raskanir.

Fyrir hverja

Starfsfólk leikskóla. Námskeiðið getur einnig nýst starfsfólki grunnskóla sem kemur að kennslu í 1. og 2. bekk.
Ráðgjafa sveitafélaga sem veita ráðgjöf til starfsfólks leikskóla eða á yngsta stigi í grunnskóla.

Nánar um kennara

Elísa Guðnadóttir er sálfræðingur með BA og Cand.psych. gráðu í sálfræði frá Háskóla Íslands. Elísa vann á Þjónustumiðstöð Breiðholts frá 2009 til 2017 við greiningar og ráðgjöf til foreldra og kennara leikskóla- og grunnskólabarna vegna þroskafrávika og hegðunar- og tilfinningavanda barna og unglinga. Elísa hefur starfað á Sálstofunni frá árinu 2017 í meðferðarvinnu með börn, unglinga og foreldra þeirra með áherslu á atferlismeðferð og hugræna atferlismeðferð. Að auki hefur hún haldið fjölda námskeiða meðal annars um hegðunarstjórnun og leiðir til að takast á við tilfinningavanda barna og unglinga. Elísa lauk Sérnámi í hugrænni atferlismeðferð hjá Endurmenntun Háskóla Íslands vorið 2019.