Í um átta aldir, frá 711 til 1492, réðu múslimar að meira eða minna leyti yfir Íberíuskaga, þar sem í dag eru Spánn og Portúgal, og kölluðu ríki sitt Al-Andalus. Í námskeiðinu munum við fara yfir helstu tímabil og atburði sem mótuðu þá sögu og skoða ýmsar merkar minjar á sviðum byggingarlistar, bókmennta, lista og fræða.

Á þessu námskeiði verður farið yfir tæplega átta hundruð ára sögu múslima á Spáni. Meðal umfjöllunarefna verður aðdragandi og framvinda innrásar múslima á Íberíuskaga árið 711, ríki múslima og blómaskeið þess næstu aldir, uppgang lista, bókmennta, byggingarlistar og fræða, mikilvægi arabíska tungumálsins og þýðingar á verkum arabískra fræðimanna á latínu. Sérstakri athygli verður beint að merkustu minjum þessa tímabils eins og Alhambra í Granada og moskunni í Cordoba. Einnig munum við skoða hvernig hugmyndir Evrópumanna um íslam og múslima mótuðust að hluta til vegna kynna þeirra af múslimum á Spáni, og hvernig kristin samfélög náðu yfirhöndinni á Íberíuskaga á síðmiðöldum. Að lokum verður arfleifð Al-Andalus skoðuð, hvernig það hefur innblásið bókmenntir, fræði og tónlist síðari tíma, og svo hvernig Spánverjar og aðrir túlka þessa áhugaverðu og umdeildu fortíð.

Á námskeiðinu er fjallað um

• Uppruna og útbreiðslu íslam og landvinninga múslima á Íberíuskaga
• Sögu múslima á Íberíuskaga á miðöldum
• Helstu minjar Al-Andalus: Byggingar, bókmenntir, listir og fræði
• Arfleifð Al-Andalus

Ávinningur þinn

• Að fá innsýn inn í rúmlega átta alda sögu múslima á Íberíuskaga
• Að fá yfirsýn og samhengi fyrir merkar minjar og arfleifð samfélags þeirra
• Að fá tilfinningu fyrir þessari sögu og þýðingu hennar fyrir okkar tíma

Fyrir hverja

Áhugafólk um sögu og menningu Spánar og Portúgal, miðaldasögu, Evrópusögu, íslam og arabísku. Gæti einnig höfðað til aðila í ferðaþjónustu, t.a.m. leiðsögufólks.

Nánar um kennara

Þórir Jónsson Hraundal útskrifaðist með BA í málvísindum frá Háskóla Íslands 1998 og svo með M.Litt. frá Faculty of Oriental Studies við Háskólann í Cambridge árið 2005. Hann varði doktorsritgerð sína um víkinga í austurvegi í arabískum heimildum við Bergenháskóla 2013. Þórir stofnaði og hefur haft umsjón með námsleið í Mið-Austurlandafræðum og arabísku við HÍ frá árinu 2015.