Talsvert hefur verið rætt og ritað um þarmaflóru og heilsu á undanförnum árum. Flestir vita nú orðið að örverur í mannskepnunni eru fleiri að tölu en líkamsfrumurnar. Þær búa víðar en í þörmunum og eiga samskipti við hýsil sinn til góðs og ills. 

Á námskeiðinu Örverusamfélag manna - Samskipti örvera við hýsil sinn til góðs og ills verður fjallað um ólík örverusamfélög á mismunandi búsvæðum mannslíkamans. Undanfarinn áratug hefur tækni sem lýtur að greiningu örvera fleygt fram svo um munar. Þannig hefur stóraukist þekking okkar á örverusamfélaginu, bæði umfangi og samsetningu. Hvar og hvernig setjast örverur að? Hvað ræður því? Sambúðin - sambýli vs. sambúð (commensalismi/symbiosis), heilsufar, sjúkdómar og dysbiosis” Hvað hefur áhrif á örverusamfélagið? Hvernig hefur örverusamfélagið áhrif á heilbrigði og sjúkdóma.

Heilbrigt örverusamfélag í hraustum líkama!

Á námskeiðinu er fjallað um

• Örverusamfélög í og á mannslíkamanum.
• Sambúð, sambýli og dysbiosis.
• Tilurð í bernsku, áhrif sýklalyfja og mataræðis.
• Tengsl örverusamfélags við sjúkdóma.
• Samskipti við ónæmiskerfið.
• Heilbrigt örverusamfélag og viðhald þess.

Ávinningur þinn

• Að fræðast um örverusamfélag mannslíkamans umfram það sem í daglegu tali er kallað þarmaflóra.
• Að gera sér grein fyrir mikilvægi fyrsta æviskeiðisins í sambúð við örverur.
• Að skilja mun á sambýli og samlífi við örverur.
• Að skilja hugtakið dysbiosis.
• Að fá innsýn í samskipti sem hafa áhrif á heilsu og sjúkdóma.

Fyrir hverja

Heilbrigðisstéttir, líffræðingar, umhverfisfræðingar. Gert verður ráð fyrir grunnþekkingu á líffræði örvera og grundvallarstarfsemi ónæmiskerfisins.

Nánar um kennara

Erna Milunka Kojic er yfirlæknir smitsjúkdómadeilar Landspítala. Hún hefur áratuga reynslu á sviði smitsjúkdóma bæði í klínískri vinnu, kennslu og rannsóknum, lengst af í Bandaríkjunum (Brown Háksólann í Rhode Island og Mount Sinai í New York). Hún hefur sérstakan áhuga á örverum og áhrifum þeirra á mannslíkamann.

Helga M. Ögmundsdóttir er prófessor emerita við læknadeild HÍ. Hún kenndi frumulíffræði og ónæmisfræði við læknadeild og tannlæknadeild um áratuga skeið. Rannsóknir hennar eru á sviði krabbameinsfræða og ónæmisfræði.