Langar þig að þekkja betur það sem ber fyrir augu þegar þú horfir upp í stjörnuhimininn? Á þessu námskeiði lærir þú að skoða stjörnuhimininn; sól, tungl, stjörnur og norðurljós yfir Íslandi.

Himinninn er helmingurinn af hinni sýnilegu náttúru í kringum okkur. Á stjörnuhimninum má sjá ótal undur sem gaman er að skoða með berum augum eða sjónaukum. Á námskeiðinu verður stiklað á stóru um allt það helsta sem íslenski stjörnuhiminninn hefur upp á að bjóða; stjörnumerki, tungl og reikistjörnur, norðurljós og norðurljósaspár og almyrkvann á sólu 2026. 

Á námskeiðinu er fjallað um

• Næturhiminninn og helstu fyrirbæri sem sjá má með berum augum og sjónaukum.
• Sjónauka og annan búnað til stjörnuskoðunar og stjörnuljósmyndunar.
• Norðurljós og norðurljósaspár.
• Sól- og tunglmyrkva.

Ávinningur þinn

• Að læra og lesa i stjörnuhiminninn og rýna í norðurljósaspár.
• Að læra á búnað til stjörnuskoðunar.
• Að öðlast enn meiri þekkingu á náttúrunni í kringum þig.
• Að geta miðlað þekkingu um himinninn til annarra.

Fyrir hverja

Námskeiðið er fyrir öll þau sem hafa áhuga á stjörnufræði og stjörnuskoðun og vilja auka þekkingu sína á næturhimninum. Námskeiðið hentar sérstaklega vel leiðsögufólki, náttúrufræðikennurum í grunn- og framhaldsskólum og öllum sem eiga sjónauka. Áhersla er lögð á það sem sjá má með berum augum og með handsjónaukum og litlum stjörnusjónaukum. Auk þess verður notkun stjörnusjónauka kennd. 
 

Aðrar upplýsingar

Stuðst verður við bókina Stjörnuskoðun fyrir alla fjölskylduna https://www.forlagid.is/vara/stjoernuskodun/ 

Gott er að eiga handsjónauka og/eða stjörnusjónauka en ekki skilyrði. 
 

Nánar um kennara

Sævar Helgi Bragason hefur áralanga reynslu af kennslu og miðlun stjarnvísinda. Hann hefur bakgrunn í stjörnufræði og jarðfræði en hefur lengst af starfað við að miðla vísindum til barna og fullorðinna. Hann er umsjónarmaður Nýjasta tækni og vísindi á RÚV, tíður gestur í fjölmiðlum landsins að tala um vísindi og höfundur fjölda bóka um vísindi fyrir börn og fullorðna. Sævari finnst fátt skemmtilegra en að góna upp í heiðskíran næturhimininn og sýna öðrum undrin sem þar leynast.