Á námskeiðinu fer Katrín Jakobsdóttir yfir sögu íslenskra glæpasagna frá upphafi og kynnir helstu kenningar um glæpasögur og vinsældir þeirra. Fjallað verður um uppruna glæpasagna og hvernig hefðin varð í kjölfarið til á Íslandi. Rakin verður saga íslenskra glæpasagna í samhengi við alþjóðlega þróun og kynntar helstu kenningar um glæpasögur, tilurð þeirra og vinsældir.
 

Á námskeiðinu er fjallað um

• Glæpasögur fram á níunda áratug 20. aldar og kynntir helstu höfundar og sögur.
• Þróun og aðdraganda íslenska glæpavorsins sem talið er að hefjist í kringum aldamótin.
• Nýja íslenska höfunda og sérkenni þeirra.
• Þróun á alþjóðavettvangi.
   

Ávinningur þinn

• Þátttakendur öðlast grundvallarskilning á glæpasögum, kynnast helstu greiningartækjum sem auðvelda við greiningu á afþreyingarbókmenntum og kynnast sögu bókmenntagreinar sem er orðin ein af útflutningsgreinum Íslands.

Fyrir hverja

Fyrir öll þau sem hafa yndi af glæpasögum, vinna í tengslum við bækur og vilja bæta líf sitt með því að skilja betur heiminn í gegnum afþreyingarmenningu. Ennfremur fyrir öll þau sem vilja skilja betur tengsl bókmennta og hugmynda okkar um þjóðina.
 

Aðrar upplýsingar

Þátttakendur fá glærur í fyrsta tíma sem þeir geta stuðst við í tímunum. Þá verður dreift textabrotum til kynningar og bókalista.

Nánar um kennara

Katrín Jakobsdóttir fjallaði um sögu íslenskra glæpasagna í BA-ritgerð sinni (1999) og um samfélagsmynd íslenskra glæpasagna í MA-ritgerð sinni (2004). Hún hefur birt margar fræðigreinar um efnið og hefur sjálf skrifað glæpasöguna Reykjavík (2022) með Ragnari Jónassyni. Hún sat á Alþingi 2007-2024 og gegndi embætti forsætisráðherra 2017-2024.