Í verkefninu „Gríptu tækifærið“ er unnið með bernskulæsi og markvisst unnið að því að skapa jákvætt viðhorf til lesturs. Ferlið leggur grunn að því að börn þrói með sér færni til að skilja umhverfið, miðla þekkingu, reynslu eða upplifun til annarra. Meðal annars er unnið að markvissri málörvun í litlum hópum. 
Markmið verkefnisins er að dýpka málumhverfi barnanna, auka ígrundun í starfi og efla sameiginlega ábyrgð starfsfólks. 

Á námskeiðinu verður fjallað um leiðir til að virkja börn og starfsfólk leikskóla í starfi tengdu bernskulæsi (e. emergent literacy). 
Lestur er undirstaða námsárangurs og því mikilvægt að byrja lestrarferlið snemma. Lestur er samofinn mörgu í lífinu; samskiptum, sjálfstæði, þekkingaröflun og fleiru. Við sjáum ítrekað fréttir um dalandi árangur íslenskra barna í lestri og sérstaklega barna með íslensku sem annað tungumál og viljum með þessu verkefni gefa starfsfólki leikskóla verkfæri til að sporna við þessari þróun. 

Á námskeiðinu verður því farið yfir hvernig er hægt að kveikja áhuga barna á lestri og efla færni þeirra í að lesa í umhverfið sem er öflug undirstoð fyrir hinn eiginlega lestur.

Á námskeiðinu er fjallað um

• Mikilvægi bernskulæsis.
• Hvernig getum við innleitt ríkulegt málumhverfi.
• Hugmyndir að skipulagi og uppsetningu.
• Hvað viljum við uppskera.

Ávinningur þinn

• Að öðlast dýpri skilning á lestri ungra barna.
• Að efla lestrarumhverfi leikskólans.
• Að efla starfsfólk í starfi.

Fyrir hverja

Námskeiðið er ætlað leikskólakennurum eða öðru fagfólki sem starfar í leikskóla. Námskeiðið er kjörið fyrir þau sem vilja efla málumhverfi barna og vilja taka þátt í því að skapa betri tækifæri fyrir börn til að efla lestur til framtíðar.

Nánar um kennara

Edda Sigrún Svavarsdóttir er leikskólakennari með viðbótardiplómu í menntastjórnun og matsfræði. Agnes Björg Kristjánsdóttir er þroskaþjálfi í meistaranámi sérkennslu. Báðar eru með langa reynslu af starfi í skólakerfinu.