Á námskeiðinu verður fjallað um sáningu og ræktun algengra og auðræktanlegra kryddjurta og matjurta. Sagt frá mismunandi tegundum og afbrigðum og á hvaða árstíma er vænlegast að sá til hverrar tegundar. Þátttakendur fá fræðslu um hvaða ræktunaraðstæður og hvaða aðföng þarf til að ná góðum ræktunarárangri.

Mikil lífsgæði eru í því fólgin að geta haft ferskt grænmeti úr eigin ræktun á borðum drjúgan hluta ársins. Með því að auka við þekkingu sína á markvissan hátt næst betri ræktunarárangur. 

Flestar mat- og kryddjurtir sem henta til útiræktunar hérlendis þarf að forrækta í nokkrar vikur innanhúss eða undir gróðurhlíf áður en til útplöntunar kemur. Þátttakendur fá upplýsingar um sáðtöflur sem tilgreina sáðtíma og umhirðu mismunandi tegunda, vaxtarrými, næringarþörf þeirra og hæfilegt „sýrustig“ – pH. Fjallað verður um ræktunarferlið, allt frá vali á fræi, sáningu, dreifplöntun, umhirðu að neyslu og geymslu.

Á námskeiðinu verður stuðst við bókina Garðverkin. Þátttakendum býðst bókin á hagstæðu verði.

Á námskeiðinu er fjallað um

• Matjurtir, tegundaval, afbrigði og sáðtíma.
• Kryddjurtir, tegundaval, afbrigði og sáðtíma.
• Herslu og undirbúning útplöntunar.
• Undirbúning jarðvegs, áburð, útplöntun og vökvun.
• Umhirðu eftir útplöntun.
• Meindýr og sjúkdóma.
• Notkun basiliku og sýndar ljósmyndir.    

Ávinningur þinn

• Meiri færni í að stunda farsæla ræktun, velja réttar tegundir og fá holla og góða uppskeru.
• Aukinn skilningur samspili hita, vatns, næringar og sýrustigs.
• Grænmetisræktun er mörgum holl og góð útivera sem tilvalið er að gera að skemmtilegu fjölskylduverkefni.

Fyrir hverja

Námskeiðið er ætlað almennum garðeigendum og öllu áhugafólki um matjurtarækt.

Aðrar upplýsingar

Mælt er með að nemendur hafi bókina Garðverkin við hendina.

Nánar um kennara

Steinn Kárason M.Sc. kenndi umhverfisstjórnun, umhverfis- og auðlindahagfræði og leiðbeindi við B.Sc.- lokaverkefni nemanda við Háskólana á Akureyri og Bifröst.Hann hefur einnig kennt við Garðyrkjuskólann og haldið fjölda fyrirlestra um gróður og umhverfismál víða um land. Steinn var ritstjóri og hefur skrifað bækur og blaðagreinar, samið tónlist og unnið að dagskrárgerð fyrir útvarp og sjónvarp. Hann er upphafsmaður að endurheimt Brimnesskóga í Skagafirði og starfaði sem garðyrkjuverktaki og garðaráðgjafi.