Börn og ungmenni með átröskun krefjast umframstuðnings og áskoranir sem foreldrar standa frammi fyrir eru því ólíkar öðrum vanda. Á námskeiðinu verður farið í stuðningsaðferðir sem hafa reynst foreldrum og aðstandendum hjálplegar þannig að þeir geti veitt stuðning við bataferlið. Jafnframt hefur reynst gagnlegt fyrir foreldra að vera í hópi með öðrum foreldrum sem glíma við sama vanda en námskeiðið er þannig um leið stuðningur við foreldra.
 

Markmiðið með námskeiðinu er að fræða og styrkja foreldra/aðstandendur í að vera hjálplegur stuðningur í bataferli einstaklings með átröskun. Námskeiðið gagnast foreldrum og öðrum aðstandendum unglinga/ungs fólks á aldrinum ca. 11-24 ára, hvar sem það er statt í bataferlinu. 

Á námskeiðinu er veitt fræðsla um átraskanir og foreldrum/aðstandendum kenndar hjálplegar aðferðir í stuðningshlutverkinu, eins og hvatning og að setja mörk á jákvæðan hátt. Verkefni eru unnin í tímum og á milli tíma og boðið er upp á umræður. Unnið er með erfiðleika í samskiptum, hindranir í bataferlinu, tengsl, samstöðu foreldra og raunhæfar væntingar til einstaklings með átröskun. Jafnframt er unnið með tilfinningaviðbrögð foreldra/aðstandenda og þau þjálfuð í uppbyggilegum viðbrögðum. Styrktar eru leiðir í að efla vilja dóttur/sonar til að takast á við átröskun. Foreldrar/aðstandendur fá tvo bæklinga og fræðsluefni sem sent verður rafrænt.

Á námskeiðinu er fjallað um

• Fræðsla um sjúkdóminn, batann og pytti í bataferlinu.
• Verkefni í tímum og á milli tíma: Reynsla, batavilji, virk hlustun, breytingar á heimili, hvatningarsamtal, stuðningur. 
• Samtal í hóptímum.
• Annað fræðsluefni: samskipti, áskoranir og tilfinningastjórnun.

Ávinningur þinn

• Að öðlast færni í að styðja við dóttur/son á uppbyggilegan hátt.
• Að setja mörk á jákvæðan hátt.
• Að takast á við eigin tilfinningaviðbrögð.
• Að ráða við pytti í bataferlinu.
• Að hlúa að sjálfum sér.

Nánar um kennara

Dr. Margrét Gísladóttir er sérfræðingur í geðhjúkrun og fjölskyldufræðingur. Hún er með doktorsgráðu í geðhjúkrun með áherslu á fjölskyldmeðferð og foreldrahópa.   Margrét vinnur í Domus mentis geðheilsustöð en hefur áður unnið til fjölda ára á geðsviði Landspítala, meðal annars á geðgöngudeild barna  og  unglinga (BUGL), göngu- og legudeild geðdeilda við Hringbraut og einnig á átröskunardeild í London. Margrét var einn af stofnendum átröskunarteymis Landspítala í byrjun aldarinnar.