Nægur svefn er meginundirstaða líkamlegrar og andlegrar heilsu og þroska barna. Flestir umönnunaraðilar upplifa á einhverjum tímapunkti áskoranir í tengslum við svefntíma, daglúrinn og/eða nætursvefninn. Slíkar áskoranir geta undið hratt upp á sig og verið streituvekjandi fyrir börn og umönnunaraðila. Ef þú vilt læra hvernig er hægt að fyrirbyggja að slíkt gerist, kynnast mismunandi leiðum til að takast á við erfiðleika þegar þeir koma upp og/eða fræðast um svefn barna þá gæti þetta verið námskeið fyrir þig.
 

Á þessu fræðslunámskeiði verður leitast við að svara algengum spurningum umönnunaraðila um svefn barna á leikskólaaldri. Af hverju er svefn mikilvægur? Hversu mikinn svefn þurfa börn að jafnaði? Hvað telst til svefnerfiðleika? Hvaða umhverfisþættir geta ýtt undir og viðhaldið svefnerfiðleikum? Hvaða hlutverk spilar daglúrinn og hvenær á að taka hann út? Hvað eru góðar svefnvenjur? Hvað er til ráða ef barn fæst ekki í rúmið, er lengi að sofna, þarf aðstoð við það eða getur ekki sofið í sínu rúmi? Þetta eru spurningar sem allir umönnunaraðilar barna á leikskólaaldri ættu að geta nýtt sér svör við, sama hvort þeir eiga börn á leikskólaaldri sem eru að glíma við svefnerfiðleika eða vilja fyrirbyggja að eðlilegar svefntruflanir endi sem langvarandi svefnerfiðleikar.

Á námskeiðinu er fjallað um

• Eðli svefns. 
• Þætti sem geta haft áhrif á svefn og ýtt undir og viðhaldið svefnerfiðleikum.
• Mismunandi tegundir svefnerfiðleika (yfirlit).
• Daglúrinn.
• Góðar svefnvenjur.
• Hagnýtar leiðir til að takast á við svefnerfiðleika með kerfisbundnum hætti.

Ávinningur þinn

• Öðlast þekkingu og skilning á eðli svefns og hvernig og hvers vegna svefnerfiðleikar geta undið hratt upp á sig.
• Kynnist mismunandi leiðum til að fyrirbyggja og takast á við svefnerfiðleika barna á leikskólaaldri og lærir að það er ekki nein ein leið sem hentar öllum þó það séu ákveðnir þættir sem er mikilvægt að hafa í huga og vara sig á.
• Færð aðgang að fræðsluefni um svefn barna og skráningarblöðum sem hægt er að nýta til að kortleggja svefn og helstu áhrifaþætti og fylgjast með framvindu íhlutunar.

Fyrir hverja

Þau sem koma að umönnun barna á leikskólaaldri, til dæmis foreldra, starfsfólk leikskóla, ömmur og afa.

Nánar um kennara

Elísa Guðnadóttir útskrifaðist sem sálfræðingur frá HÍ árið 2008, úr sérnámi í hugrænni atferlismeðferð frá EHÍ árið 2019 og hlaut nafnbótina sérfræðingur í klínískri barnasálfræði árið 2023. Hún starfaði á Þjónustumiðstöð Breiðholts fráárinu 2009 til 2017 við greiningar á þroska, hegðun og líðan barna og unglinga og ráðgjöf til foreldra og starfsfólks leik- og grunnskóla. Elísa starfaði á Sálstofunni ehf. frá árinu 2017 til ársins 2023. Þar sinnti hún meðferð, ráðgjöf og greiningum vegna hegðunar- og tilfinningavanda barna og unglinga ásamt því að sinna námskeiðahaldi fyrir börn, foreldra og starfsfólk leik- og grunnskóla. Elísa hefur í fjölda ára haldið fræðsluerindi um svefn leikskólabarna og veitt ráðgjöf og sinnt meðferð vegna svefnerfiðleika barna á öllum aldri.  Elísa starfar nú hjá Kópavogsbæ sem ráðgjafi farsældar í leikskólum.