Um er að ræða réttindanámskeið þar sem kennt er að leggja fyrir greiningarprófið Hljóðfærni. Markmiðið með fyrirlögn greiningarprófsins er að greina nánar vanda þeirra barna í 1. bekk grunnskóla sem grunur leikur á að séu með frávik í hljóðkerfisvitund.
 

Hljóðfærni er greiningarpróf sem ætlað er nemendum í 1. bekk grunnskóla og teljast í áhættuhópi vegna lesblindu. Um er að ræða einstaklingspróf sem hefur það að markmiði að greina nánar hljóðkerfisvanda nemenda og bera saman við jafnaldra. Prófið er ítarlegt og tekur á mörgum þáttum hljóðkerfisvitundar, þar á meðal eru mörg verkefni sem greina hljóðavitund. Við uppbyggingu á Hljóðfærni var leitast við að hanna próf sem væri í senn þægilegt í fyrirlögn og höfðaði til barna á umræddum aldri. Einnig var lögð áhersla á að auðvelt væri að skipuleggja íhlutun í framhaldi af niðurstöðu greiningar. Byggt er á hugmyndafræði snemmtækrar íhlutunar og kennurum leiðbeint sérstaklega með hvernig hægt er að taka á vanda þeirra barna sem eru með veikleika í hljóðkerfisvitund.

Á námskeiðinu er fjallað um

• Fræðilegan bakgrunn prófsins.
• Uppbyggingu prófsins og reglur um fyrirlögn.
• Próffræðilega eiginleika og tölfræðilega úrvinnslu prófsins.
• Hugmyndir að kennslufræðilegum úrræðum í framhaldi af greiningu.

Ávinningur þinn

• Greiningin á að auðvelda kennurum og meðferðaraðilum að kortleggja vanda nemenda og leggja grunn að kennslufræðilegri íhlutun þannig að hægt sé að draga úr, eða jafnvel fyrirbyggja lestrarerfiðleika nemandans.

Fyrir hverja

Námskeiðið er ætlað sérkennurum, talmeinafræðingum og lestrarfræðingum.

Nánar um kennara

Bjartey Sigurðardóttir, M.Ed. talmeinafræðingur og verkefnisstjóri læsis hjá Mennta- og lýðheilsusviði Hafnarfjarðar.
 

Sigurgrímur Skúlason, Ph.D. í próffræði og matsfræðum og séfræðingur í prófagerð hjá Miðstöð menntunar og skólaþjónustu og einnig aðjúnkt í megindlegri sálfræði við Háskóla íslands.