Netglæpir hafa á undanförnum árum færst nær okkar daglega lífi og eru nú algengt fyrirbæri. Aðeins hluti þessara brota er tilkynntur, meðal annars vegna ótta brotaþola við álitshnekki eða annan ímyndarskaða. Því vaknar spurningin: Er fyrirtækið eða stofnunin þín með nægjanlegar varnir til að vernda mikilvægustu upplýsingar og gögn gegn netárásum?

Á þessu hagnýta námskeiði verður farið yfir hvernig fyrirtæki og stofnanir geta byggt upp öflugar varnir gegn þessum ört vaxandi vágesti. Námskeiðið veitir yfirsýn yfir eðli netglæpa, birtingarmyndir þeirra í daglegu lífi og helstu veikleika í starfsemi en glæpamenn nýta sér.

Áhersla er lögð á:

• Að greina og skilja eðli og birtingarmyndir netglæpa í daglegu lífi og starfsemi.
• Að þekkja helstu veikleika í starfsemi sem netglæpamenn nýta sér og hvernig hægt er að bregðast við þeim.
• Yfirsýn yfir skipulag netöryggismála á Íslandi og helstu stoðir laga- og reglugerðarrammans, þar á meðal NIS-tilskipunina og DORA-löggjöfina.
• Þekking á árangursríkum tólum, verklagi og raunhæfum aðgerðum sem styðja við öflugar varnir gegn netglæpum.
• Hæfni til að leggja grunn að markvissu og skipulögðu netöryggisstarfi á eigin vinnustað.

Þá er lögð áhersla á að veita þátttakendum þekkingu og hagnýtar leiðbeiningar sem nýtast strax í starfi þeirra.

Ávinningur þinn

• Yfirsýn yfir eðli og birtingarmynd netglæpa.
• Þekking á mikilvægustu atriðum laga- og reglugerðarrammans og hvaða áhrif það hefur á hefðbundna vinnustaði.
• Hæfni til að leggja grunninn að skipulögðu starfi til að byggja upp varnir gegn netglæpum á sínum vinnustað.

Fyrir hverja

Námskeiðið er ætlað stjórnendum og starfsfólki fyrirtækja og stofnana sem bera ábyrgð á viðkvæmum upplýsingum eða gögnum. Engar forkröfur eru gerðar um  þekkingu á netöryggi, upplýsingatækni eða tengdu lagaumhverfi.

Nánar um kennara

Einar Birkir Einarsson er með M.Sc. í rafmagnsverkfræði frá DTU í Danmörku og starfar sem sviðsstjóri stafrænnar þróunar og reksturs hjá LSR. Hann hefur víðtæka reynslu sem stjórnandi og sérfræðingur í upplýsingatækni hjá meðal annars Vodafone, Byr sparisjóði, Reiknistofu bankanna og fjármála- og efnahagsráðuneytinu. Hann hefur einnig setið í Netöryggisráði og unnið að málefnum upplýsingatækni fyrir ESS, Norrænu ráðherranefndarinnar og EFTA.