Til eru yfir 200 mismunandi gigtarsjúkdómar en stór hluti þeirra eru talinn vera vegna sjálfsofnæmis. Mikil þróun hefur átt sér stað á síðustu áratugum í meðferð gigtarsjúkdóma samfara aukinni þekkingu á sjúkdómunum.

Á námskeiðinu verður fjallað um algenga gigtarsjúkdóma með áherslu á sjálfsofnæmissjúkdóma m.a. iktsýki, rauða úlfa, sóragigt og hrygggikt. Fjallað verður um tilurð þessara sjúkdóma og greiningarferli. Tengsl milli gigtarsjúkdóma og annarra sjálfsofnæmissjúkdóma sem og hjarta- og æðasjúkdóma, krabbameins og beinþynningar verða skoðuð. Þá verður fjallað um líftæknilyf og önnur lyf sem notuð eru til að hægja á eða stöðva sjúkdómsgang (disease modifying anti-rheumatic drugs).

Á námskeiðinu er fjallað um

• Orsakir gigtarsjúkdóma.
• Greiningarferli gigtarsjúkdóma.
• Sjúkdómsgang og einkenni gigtarsjúkdóma.
• Tengsl við aðra sjúkdóma.
• Gigtarlyf.

Ávinningur þinn

• Skilningur á orsökum gigtarsjúkdóma.
• Þekking á einkennum og greiningu gigtarsjúkdóma.
• Innsýn inn í meðferðarmöguleika í gigtarsjúkdómum.

Fyrir hverja

Námskeiðið er fyrir heilbrigðisstarfsfólk.

Nánar um kennara

Umsjón hafa dr. Katrín Þórarinsdóttir, PhD sérfræðingur í gigtlækningum, og Gerður Gröndal, dósent og sérfræðingur í lyf- og gigtlækningum.