Styttri gönguferðir að vetrarlagi freista margra enda Ísland ein gönguleiðakista að vetrar- sem sumarlagi.

Á þessu námskeiði verður farið yfir nokkrar gönguleiðir sem henta vel til göngu að vetri til. Gefið verður yfirlit yfir þann búnað sem þarf til vetrargönguferða, allt frá fatnaði upp í hálkubrodda og annan öryggisbúnað. Kynntar verða leiðir þar sem snjóflóðahætta er ekki til staðar og síður þarf sérhæfðan vetrarbúnað eins og mannbrodda og ísaxir svo eitthvað sé nefnt.

Á námskeiðinu er fjallað um

• Gönguleiðir sem henta vel til vetrargöngu.
• Hvað þarf að hafa í huga í göngum að vetri til.
• Helsta búnað sem þarf til gönguferða að vetrarlagi.

Ávinningur þinn

• Þú verður mun fróðari um ýmsar gönguleiðir sem henta að vetri.
• Þú færð í hendur fróðleik sem hjálpar þér að útbúa vetrargönguna.
• Þú styrkir þekkingu þína á þeim búnaði sem þarf til gönguferða að vetrarlagi.

Fyrir hverja

Námskeiðið hentar öllum þeim sem áhuga hafa á göngum að vetrarlagi en ekki síður þeim sem einungis vilja fara í skemmtilegt og fróðlegt ferðalag í skólastofu í Vesturbæ Reykjavíkur.

Aðrar upplýsingar

Þátttakendur þurfa ekki að taka neitt sérstakt með sér en gott að hafa með sér glósubók/forrit til að punkta niður þau atriði sem koma upp.

Nánar um kennara

Jónas Guðmundsson er gönguleiðsögumaður og ferðamálafræðingur. Hann hefur leiðsagt víða um land og starfað við skála- og landvörslu. Hann hefur um árabil skrifað allnokkuð um gönguleiðir og er höfundur bókarinnar Gönguleiðir á hálendinu sem kom út hjá Sölku 2021. Sú bók var á metsölulista í sínum flokki stærsta hluta sumarsins.