Himinninn er helmingurinn af náttúrunni í kringum okkur. Á stjörnuhimninum má sjá ótal undur sem gaman er að skoða með berum augum eða sjónaukum. Á námskeiðinu verður stiklað á stóru um sólkerfið, stjörnur og vetrarbrautir, leit að lífi í geimnum og fjallað um uppruna alheimsins.
 

Hér er um að ræða kjörið námskeið fyrir forvitna á öllum aldri. Með hverju  námskeiðsgjaldi fylgir því ókeypis sæti fyrir eitt ungmenni undir 18 ára aldri.
 

Lögð verður áhersla á fyrirbæri sem sjá má með berum augum, handsjónaukum og litlum stjörnusjónaukum. Þátttakendum býðst að koma í stjörnuskoðunarferðir á Hótel Rangá þegar veður leyfir og þá býðst þátttakendum að mæta með sína eigin sjónauka til að læra á þá. 

Námskeiðið byggist upp á fyrirlestrum þar sem hvatt er til virkrar þátttöku og umræðna.

Á námskeiðinu er fjallað um

• Næturhimininn og helstu fyrirbæri sem sjá má með berum augum og sjónaukum.
• Sjónauka og annan búnað til stjörnuskoðunar og stjörnuljósmyndunar.
• Norðurljós og norðurljósaspár.
• Reikistjörnurnar, fylgitungl þeirra, smástirni, halastjörnur og lofsteina í sólkerfinu okkar.        
• Sólina, myndun, þróun og endalok stjarna, svarthol og nifteindastjörnur.
• Fjarreikistjörnur og leitina að lífi í geimnum.
• Vetrarbrautir, vetrarbrautaþyrpingar og hulduefni.
• Uppruna, þróun og endalok alheimsins.

Ávinningur þinn

• Að læra og lesa í stjörnuhiminninn og rýna í norðurljósaspár.
• Að læra á búnað til stjörnuskoðunar.
• Að öðlast þekkingu á sólkerfinu okkar, mismunandi tegundum stjarna, vetrarbrautum og uppruna alheimsins.
• Að læra helstu hugtök í stjörnufræði og auðvelda þér að afla þér frekari þekkingar.
• Að öðlast færni til að miðla þekkingu til annarra, sér í lagi ferðafólks. 

Fyrir hverja

Námskeiðið er fyrir öll þau sem hafa áhuga á nóttinni, stjörnufræði og stjörnuskoðun og vilja auka þekkingu sína á viðfangsefnunum. Það hentar sérstaklega vel leiðsögufólki og kennurum á öllum skólastigum sem vilja bæta við þekkingu sína. 
Ekki eru gerðar kröfur um fyrri þekkingu þátttakenda á viðfangsefninu.

Aðrar upplýsingar

Stuðst verður við bókina Stjörnuskoðun fyrir alla fjölskylduna eftir Sævar Helga Bragason. 
Annað ítarefni er á stjornufraedi.is

Nánar um kennara

Sævar Helgi Bragason hefur áralanga reynslu af kennslu og miðlun stjarnvísinda. Hann hefur bakgrunn í stjörnufræði og jarðfræði en hefur lengst af starfað við að miðla vísindum til barna og fullorðinna. Hann er umsjónarmaður Nýjasta tækni og vísindi á RÚV, tíður gestur í fjölmiðlum landsins að tala um vísindi og höfundur fjölda bóka um vísindi fyrir börn og fullorðna. Sævari finnst fátt skemmtilegra en að góna upp í heiðskíran næturhimininn og sýna öðrum undrin sem þar leynast.