Kynnt verður leið til að meta talna- og aðgerðaskilning barna sem eru að hefja grunnskólagöngu. Þetta eru matsverkefni sem lögð eru fyrir munnlega og frammistaðan borin saman við matskvarða. Einnig verður kynnt leið til að virkja foreldra þeirra barna sem þurfa sérstaka örvun.

Á námskeiðinu verður farið yfir þróun talna- og aðgerðaskilnings ungra barna. Kennt verður að nota fyrsta hluta matsverkefna úr MRP (Mathematics Recovery Program) sem varð til í áströlsku þróunarstarfi. Þau nýtast til að afla í u.þ.b. 45 mínútna viðtali upplýsinga um talna- og aðgerðaskilning barna í 1. bekk. Kennt verður að lesa í frammistöðu nemenda og hvernig mætti skrá niðurstöðurnar. Í lokin verður kynnt leið sem gefist hefur vel við að virkja foreldra til aðstoðar við að auka færni nemenda sem þurfa sérstaka örvun.

Á námskeiðinu er fjallað um

• Þróunarferlið í talna- og aðgerðaskilningi í stórum dráttum. 
• Mat talna- og aðgerðaskilning með hjálp matsverkefna úr MRP sem þróað var í New South Wales í Ástralíu.
• Hvernig setja má fram niðurstöður á einfaldan hátt til að ná yfirsýn yfir stöðu hópsins og einstakra barna.
• Einfalda leið til að virkja foreldra barna sem þurfa sérstaka örvun.

Ávinningur þinn

• Aukinn skilningur á hvernig talna- og aðgerðaskilningur þróast.
• Eignast verkfæri sem hjálpar þér við að meta stöðu nemenda þinna svo þú getir betur veitt kennslu við hæfi.
• Kynnist því hvernig virkja má foreldra á einfaldan hátt til markvissrar lotubundinnar heimavinnu með börnum sínum.

Fyrir hverja

Námskeiðið er skipulagt með kennara á yngsta stigi grunnskólans í huga sem og sérkennara sem sinna mati og ráðgjöf.

Nánar um kennara

Dóróþea Guðrún Reimarsdóttir er fyrrverandi grunnskólakennari, verkefnastjóri sérkennslu og kennsluráðgjafi á leik- og grunnskólastigi. Hún er með M.Ed. í sérkennslufræðum með áherslu á stærðfræði með ungum börnum en hefur áralanga reynslu af að kenna stærðfræði á öllu grunnskólastiginu. Dóróþea er höfundur matsverkefnanna Mat á talna- og aðgerðaskilningi sem er ætlað að greina stöðu nemenda á miðstigi. Hún hefur stýrt þróunarverkefnum í stærðfræði bæði í leik- og grunnskólum. Hún er nú sérfræðingur hjá Gloppu sf. sem m.a. stendur að baki útgáfu stærðfræðiskimunarefnisins MIO fyrir leikskóla.