Mikill áhugi á nýrri námsbraut: Framkvæmdaferli mannvirkjagerðar
26.1.2010
Mannvirkjagerð á Íslandi er í tímabundinni
lægð en hjá Endurmenntun Háskóla Íslands (EHÍ) er verið að hugsa fram í tímann
og undirbúa fólk til að takast á við verkefni framtíðarinnar með því að auka
við eigin sérþekkingu sem kemur sér vel þegar hjólin fara að snúast á ný – bæði
hér heima og erlendis. Í rúmt ár hefur verið unnið að þróun námsbrautarinnar
Framkvæmdaferli mannvirkjagerðar – fjármögnun, samningar, útboðsreglur og
uppgjör og hafa margir komið að þeirri vinnu. Má þar nefna fulltrúa frá VFÍ,
TFÍ, AÍ, FÍLA, lögfræðideild Háskóla Íslands, iðnaðarverkfræði-, vélaverkfræði-
og tölvunarfræðideild HÍ og umhverfis- og byggingarverkfræðideild HÍ.
Hugmyndin að námsbrautinni kviknaði hjá arkitektunum
Sigríði Sigurðardóttur og Ragnheiði Aradóttur sem leituðu til EHÍ. Í gegnum
störf sín höfðu þær ítrekað rekið sig á þörfina fyrir lagalegum skilningi í
samningagerð af ýmsum toga og nauðsyn þess að geta veitt samstarfsaðilum,
verkkaupum og verktökum faglega ráðgjöf í lagalegu tilliti.
Fjölbreyttur hópur
og krefjandi og hagnýt viðfangsefni
Viðbrögðin við
námsbrautinni hafa ekki látið á sér standa og hefur fjölbreyttur hópur
verkfræðinga, tæknifræðinga, arkitekta, verktaka og fleiri skráð sig í námið
sem hefst í byrjun febrúar og líkur um næstu áramót.
Námsbrautin
er ætluð öllum þeim sem starfa
við ráðgjöf og bera ábyrgð á ráðgjafasamningum, ráðningu hönnuða, útboðum, gerð
útboðsgagna, samningum við verktaka, fjármögnum verkefna og áhættugreiningu
innan fyrirtækja og stofnanna. Um er að ræða
fjölbreytt nám, þar sem áhersla er lögð á krefjandi og hagnýt viðfangsefni á
öllum helstu sviðum fjármála, ráðgjafasamninga, verksamninga, útboðum og
opinberum innkaupum auk bótaskyldu. Markmiðið
með náminu er meðal annars að nemendur öðlist
almennan skilning á undirbúningsferli framkvæmda, hönnunar- og framkvæmdaferla.
Aukin þekking og færni í að semja
og túlka hönnunar- og verksamninga og hæfni í að fást við ágreiningsmál þeim
tengdum er einnig eitt af markmiðunum.
Fjögur námskeið á tveimur misserum
Þetta er tveggja missera námsbraut sem hægt er að sækja meðfram vinnu.
Eitt námskeið er kennt í einu en alls eru þetta fjögur námskeið:
Ákvörðunarferli í framkvæmdum, Hönnunarferli framkvæmda, Ráðning verktaka og
framkvæmd verks og Réttarstaða verktaka og verkkaupa. Námið samsvarar 24 (ECTS) einingum á háskólastigi
Fyrir hverja
Námið
hentar arkitektum, landslagshönnuðum, tæknifræðingum, verkfræðingum og öðrum
ráðgjöfum í skyldum fögum sem og verktökum, verkkaupum og lögfræðingum sem
hyggjast tileinka sér þetta sérsvið.